കൊല്ലം:കെ.പി.എം.എസ്സിന്റെ ശക്തി പ്രാദേശിക പ്രവര്‍ത്തനങ്ങളില്‍ ഉണ്ടാകണമെന്നും ആശയസംവാദത്തിന് വേണ്ടിയുള്ള അവസരങ്ങള്‍ക്കുവേണ്ടി വേദിയൊരുക്കണമെന്നും പുന്നല ശ്രീകുമാര് പറഞ്ഞു. കെ.പി.എം.എസ്സിന്റെ 44-ാം സംസ്ഥാന സമ്മേളനത്തിന്റെ മുന്നോടിയായി കൊല്ലം ജില്ലാ പഞ്ചായത്ത് ഹാളില്‍ നടന്ന ജില്ലാസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ജനറല്‍ കണ്‍വീനര്‍ എന്‍.അംബുജാക്ഷന്‍ സ്വാഗതം പറഞ്ഞു. ജില്ലാ പ്രസിഡന്റ് എല്‍.രാജന്റെ അധ്യക്ഷതയില്‍ ജില്ലാ സെക്രട്ടറി ടി.എസ്.രജികുമാര്‍ പ്രവര്‍ത്തന റിപ്പോര്‍ട്ടും ട്രഷറര്‍ ഡി.ഉദയസേനന്‍ വരവുചെലവ് കണക്കും അവതരിപ്പിച്ചു. സംസ്ഥാന പ്രസിഡന്റ് പി.കെ.രാജന്‍, ആക്ടിങ് സെക്രട്ടറി വി.ശ്രീധരന്‍, സെക്രട്ടേറിയറ്റ് അംഗം എന്‍.ബിജു, വി.സത്യവതി സംസ്ഥാന കമ്മിറ്റി അംഗങ്ങളായ സോമശേഖരന്‍, സത്യാനന്ദന്‍, എം.ജെ.ഉത്തമന്‍ എന്നിവര്‍ സംസാരിച്ചു.
പട്ടികജാതി വിഭാഗത്തില്‍പ്പെട്ട വ്യക്തികള്‍ക്കും സ്വയംസഹായ സംഘങ്ങള്‍ക്കും വ്യാവസായികരംഗത്ത് കടന്നുവരുവാന്‍ കഴിയത്തക്ക രീതിയില്‍ ദീര്‍ഘകാല പദ്ധതികള്‍ ആവിഷ്‌കരിക്കണമെന്നും പെരിനാട് വിപ്ലവത്തിന്റെ നൂറാം വാര്‍ഷിക ചരിത്രസ്മാരകമായി കൊല്ലം ജില്ലാ പഞ്ചായത്ത് പരിസരത്തുള്ള കമ്മാന്‍കുളം സംരക്ഷിക്കണമെന്നും പ്രമേയത്തിലൂടെ ആവശ്യപ്പെട്ടു.
ജില്ലാ ഭാരവാഹികളായി കെ.സുരേന്ദ്രന്‍ (പ്രസി.) ഡി.സുഗതന്‍, സി.സത്യനാഥന്‍ (വൈ. പ്രസി.മാര്‍), കെ.സത്യാനന്ദന്‍ (സെക്ര.), പി.രഘു, പി.സുധാകരന്‍ (അസി. സെക്ര.) ബി.ആര്‍.ശശി (ഖജാ.) എന്നിവരെ തിരഞ്ഞെടുത്തു.
